Davao City – Gitugot ang paghatod og tabang o relief assistance alang sa mga naapektuhang residente sa Barangay 23-C ning syudad diin naka-hard lockdown karong mga panahona nunot sa daghang kaso sa COVID-19.
Matud ni Sta. Ana Police Station Commander Police Major Michael Uyanguren, pwede kining ibilin sa Barangay Control Point.
“Bisan kinsa pwede muhatod og tabang pero diha lang sa gawas. Naa man tay control points, naa man tay entrance and exit, pwede nila ihatod didto ug ato lang ipa-deliver sa mga personnel nga naa sa sulod,” sumala ni Uyanguren.
Gikanayon ni Uyanguren nga nagpabiling hapsay ug malinawon ang Barangay 23-C sukad gipailawom sa hard lockdown niadtong nakalabay’ng Sabado.
Istriktong gipatuman ang One Entry, One Exit Policy diin nagkadaiyang security units ang nakadeploy sa lugar.
RadyoMaN Aimee Guinita
