CAUAYAN CITY- Nakahanda na ang pamunuan ng Brgy. Andarayan sa posibleng paghagupit ni bagyong Leon sa kanilang lugar.
Sa panayam ng IFM News Team kay Punong Barangay Eligio Taguibao, tuwing panahon ng kalamidad ay inuuna nilang rondahan ang madalas mabaha na bahagi ng kanilang lugar katulad ng malapit sa mga ilog.
Aniya, agad na pinapalikas ang mga residente sa matataas na lugar katulad ng mga karatig na barangay upang masiguro ang kanilang kaligtasan.
Dagdag pa niya, bagama’t hindi kompleto sa kagamitan ang kanilang hanay ay nananatili namang alerto ang mga tauhan ng barangay upang respondehan ang mga nangangailangang residente.
Samantala, bukod sa pagbisita sa mga binabahang bahagi ng lugar, dinadalaw rin ang mga tindahan at sinisiguro na hindi nagbebenta ang mga ito ng alak ngayong nakataas ang liquor ban sa Lalawigan.
