Davao City – Gipaniguro sa Barangay Calinan Poblacion, Davao City ang kaandam niini panahon sa mga kalamidad labi na sa pagbaha tungod sa kusog nga mga pag-ulan.
Sa interbyu sa DXDC RMN Davao kang Kapitan Ursicio Ungab sa Brgy. Calinan Poblacion, gisulti niini nga nakaandam kanunay ang mga evacuation center ugaling magpatuman og pagpanghikling, diin anaa ang Calinan gymnasium, Calinan Central Elementary School ug isolation facilities nga bakante nga pwedeng magamit panahon sa emerhensiya.
Dugang ni Ungab nga aduna na usab silay stockpile sa food supplies panahon sa kalamidad nga mahatag sa apektadong mga residente.
Giawhag sa kapitan ang iyang mga residente labi na ang mga leader sa matag purok nga mahimong alerto kanunay aron nga maaksyonan ang problema labi na panahon sa pagtaas sa tubig sa mga sapa.
“Ang akong pahimangno sa ilaha labi na akong mga purok leaders, always alert gyud. Kay ingkaso’g mag-ulan, be vigilant lang sila. Unya, inform dayon ang barangay. Kung magkinaunsa man galing, naa ‘tay force evacuation,” matud ni Ungab.
Pasado alas-6 sa kagabii (October 21, 2021) sa dihang miabot sa Code Yellow Alert Level ang river channels sa Talomo River sa Brgy. Calinan Proper, ingon man sa Brgy. Matina Pangi river channels apan hinay-hinay ra usab kini nga nag-subside.
RadyoMaN Kirby Manzon
