Tigbao, Zamboanga del Sur – Dili na masulod sa mga taga Brgy. Upper Nilo, Tigbao, Zamboanga del Sur ang ilang Brgy. Hall kun duna silay transaksyon human kining nasunog alas 11:00 kagabii.
Naugdaw ang maong Brgy. Hall ug lakip nga nasunog ang mga papelis sa Barangay Risk Reduction Management, computer set, television ug uban pang mga ekwipo nga naa sa sulod nga bahin dihang gisugdan paglamoy sa kalayo ang ikaduhang andana partikyular sa session hall.
Sa interview RMN kang FO1 Gatuc ang imbestigador sa Pagadian City Fire Station, dako na ang kalayo dihang miabot sila sa lugar og nakontrolar ang kalayo alas 12 na sa kaadlawon.
Gitun-an pa ang sinugdanan sa kalayo samtang gibana-bana sa P50 mil pesos ang damyos sa maong sunog. Aminado usab si Mayor Danilo Dalid nga wala silay firetruck rason nga ang personahe sa BFP Pagadian maoy nakaresponde sa sunog.
Plano karun sa lokal nga kagamhanan sa Tigbao nga mangitag paagi aron makabaton og firetruck nga sarang magamit kun adunay susama nga hitabo.
