CAUAYAN CITY – NASAWI ANG ISANG BARANGAY TANOD MATAPOS TAMAAN NG BUMAGSAK NA MALAKING SANGA NG PUNO HABANG NAGPAPATROLYA SA KASAGSAGAN NG PANANALASA NG SUPER TYPHOON “NANDO” SA ISLA NG BABUYAN CLARO, CAGAYAN NOONG SETYEMBRE 22, 2025.
SA ISANG PANAYAM KAY KAGAWAD BERNIE NUNEZ, NADAANAN NG TANOD ANG KANYANG TAHANAN HABANG NAGSASAGAWA NG PAGPAPATROLYA. NANG LUMABAS ITO UPANG SILIPIN, BIGLANG BUMAGSAK ANG SANGA NG PUNO NA TUMAMA SA KANYA AT AGAD NIYANG IKINASAWI.
ISANG KAPITBAHAY ANG UNANG NAKAKITA SA INSIDENTE AT INIULAT ITO SA MGA OPISYAL. AGAD NAMANG RUMESPONDE ANG BARANGAY SUBALIT WALA NANG BUHAY ANG BIKTIMA.
PANSAMANTALANG INILAGAK ANG KANYANG LABI SA EVACUATION CENTER HABANG INAASIKASO ANG PAGPAPABATID SA KANYANG PAMILYA SA MAINLAND CAGAYAN.
MATINDI RIN ANG PINSALANG INIWAN NG BAGYO SA ISLA DAHIL HALOS LAHAT NG KABAHAYAN AY NAWALAN NG BUBONG, KABILANG ANG SIMBAHAN NA NAGSILBING EVACUATION CENTER.
AYON KAY NUNEZ, ITO NA ANG PINAKAMALAKAS NA BAGYONG NARANASAN NG KANILANG KOMUNIDAD SAPAGKAT HALOS LAHAT NG KABAHAYAN, PAARALAN AT ESTABLISYIMENTO AY NAPINSALA.
TINIYAK NAMAN NG MGA LOKAL NA OPISYAL NA NASA LIGTAS NA KALAGAYAN ANG MGA RESIDENTE HABANG NAGPAPATULOY ANG ASSESSMENT SA LAWAK AT HALAGA NG PINSALANG IDINULOT NG SUPER TYPHOON “NANDO” SA BUONG BARANGAY.
