Davao City – Mapasalamaton si Tibungco Davao City Barangay Captain Merjade Deles Calvo nga bisan sa kusog nga ulan Martes sa gabii, luwas ang iyang mga lumulupyo sa unsa mang insidente o peligro.
Sa interbyu sa DXDC RMN Davao sa kapitana, gisaysay niini nga adunay pagtaas sa tubig sa ilang area apan wala hinuoy nahitabong pag evacuate sa mga residente.
“Para sa amoang mga silingan sa barangay Tibungco wala tay angay ikabalaka kay nagamonitor pud ta. Pasalamat ta nga bisan og mitaas-taas ang tubig pero wala gyud tay mga silingan nga nabahaan o nagkinahanglan gyud og tabang,” saysay ni Calvo.
Segun ni Calvo nga nakasinati usab og traffic Martes sa gabii ang Tibungco area labi na nga tunong sa peak hours ang maong pagtaas sa tubig baha.
Gipaniguro sa kapitana nga kanunay’ng alerto ang mga residente panahon sa susamang mga kalamidad aron malikay sa unsa mang insidente.
RadyoMaN Kirby Manzon
