Gisalmutan sa ubay-ubay nga mga ginikanan ang gipahigayon nga Brigada Eskwela 2018 kagahapong adlawa didto sa may Katipunan Central School sa lungsod sa Katipunan sakop ning probinsya sa Zamboanga Del Norte.
Ang brigada eskwela 2018 adunay Tema nga “Pagkakaisa Para sa Handa, Ligtas at Matatag na Paaralan Tungo sa Magandang Kinabukasan”.
Una naman nagpahigayon ug Opening sa Brigada Eskwela niadtong adlawng Sabado didto sa barangay Sulangon sakop sa dakbayan sa Dapitan.
Apan kagahapon ang dungan nga pag bukas sa brigada eskwela diri sa tibuok Zamboanga Peninsula bisan paman sa mga kasikbit niini nga mga probinsya.
Unang gihimo kagahapon mao ang programa may kalabot sa maong kalihukan kung asa gitambungan kini sa mga dagkong opisyal sa lungsod sama ni Mayor Eguia mga kamagtutudlo, kapulisan, kasundaluhan ug uban pang mga stakeholders.
Mihatag ug mensahe si Mayor Eguia kun unsa ka mahinungdanon ang maong kalihukan sama sa pag preparar sa mga lawak saringan para sa umaabot nga abli sa klase karong hunyo 4, 2018.
Mitabang usab ang mga kasundaluhan gikan sa 53rd IB, nga naka base sa lungsod sa Osmeña gipanguluhan kini ni Sgt. Yazer Alapuddin Amil uban sa mga volunteer, anaa usab ang presensya sa PNP Katipunan, Bureau of Fire Protection aron sa pagtabang sa paglimpyo sa maong dapit.
Samtang ang mga ginikanan wala usab nagpaulahi sa maong kalihukan sa pagsalmot sa dakong kalihukan sa nahisgutan nga tulunghaan.
Atol sa mang brigada Eskwela adunay Libreng medical Mission, Libreng ibot sa ngipon pinaagi sa pribadong clinic nga mao ang Maquilan-Delima Dental clinic.
Naghatag usab ug libreng pagkaon nga tsamporado ang RMN DXDR Dipolog sa pagpanguna ni SM Edgar Dagumo uban sa iyang mga ginsakpan.
Gani gipasalamatan pag ayo sa mga katawhan ang gihatag nga serbisyo sa RMN DXDR tungod kay dili lang pagserbisyo sa kahanginan apan lakip na personal nga pagsalmot sa mga nagkadaiyang kalihukan sa bisan asang suok dinhi sa Zamboanga del norte.
Karong adlawa lain nausab nga tulunghaan ang bisitahon sa DXDR partikular didto sa may barangay sangkol aron mo partisipar sa parehong kalihukan nga mao ang Brigada Eskwela 2018.
