NAGPADAYON ang programa nga Brigada Eskwela sa Department of Education (DepEd) aron pag-andam sa limpiyo ug hapsay nga tunghaan labi na sa lawak-saringan panahon sa pormal nga pag-abli sa laing tuig tungha 2018-2019 karong Hunyo. Gipaabot nga sa unang adlaw sa klase magsugod dayon ang mga magtutudlo sa ilang leksyon ug ang pagmintinar na lang sa kalimpiyo sa palibot.
Ang Brigda Eskwela maayong ehemplo sa mithi sa pagtinabangay, human ang mga ginikanan uban sa ilang mga anak, mga magtutudlo, mga lokal nga opisyal, mga lumolupyo sa dapit ug mga boluntaryo gikan sa pribadong sektor naghiusa. Mas sayon, dali ug mabahinbahin ang galastuhan sa ginagmay nga pag-ayo sa mga tunghaan.
Ang mithi sa pagtinabangay naa na sa dugo sa mga Pinoy ug kini mahulagway sa tradisyon sa managsilingan sa kabanikanhan sama sa pagyayong sa balay nga buot ibalhin sa laing luna. Ang Brigada Eskwela naglugway sa maong mithi ug maayong masilsil kini sa kabataan.
Human sa katipunan Central School kagahapon ang RMN DXDR sa pagpanguna ni SM Edgar Dagumo uban sa tibuok pwersa didto kini mihatag ug sebisyo sa San Alfonso Elem. School didto sa may barangay Sangkol.
Mi donar ug pintal ang DXDR ug pagkaon nga tsamporado alang sa mga ginikanan ug mga kabataan nga mi apil sa brigada eskwela.
Ang maong eskwelahan adunay magtutungha nga moaabot sa kapin gatus ka mga kabataan ug adunay pito ka mga magtutdlo ikawalo niini ang ilang principal.
Gipasalamatan ni San Alfonso Elem. School Principal Joy B. Suralte nga sila ang napili sa RMN DXDR nga makadawat ug pintal para magamit sa pagpaanindot pagbalik sa ilang mga lawak saringan.
