Davao City – ‘Walay meningococcemia outbreak.’
Kini ang pagpaklaro karon sa Brokenshire Memorial Hospital sukwahi sa nagakalat nga impormasyon sa social media nga giigo sa maong balatian ang maong lugar.
Sa opisyal nga pamahayag pinaagi sa ilang Facebook page, ang maong pasyente gidudahan lamang nga nagbaton og kaso sa maong sakit kinsa dunay mga signos ug simtomas susama sa case definition sa maong balatian.
Dugang niini, gisumitir na sa microbiologist ang specimen gikan sa maong pasyente aron makumpirma gani gilayon gipatuman ang infection control protocols aron maseguro ang kaluwasan sa tanang pasyente.
“The ER and the hospital has been cleared by the Infection Control Committee and is now safe and operating normally as usual,” batbat sa maong advisory.
Kahinumdoman nga adlaw’ng Biyernes, Agosto 30, 2019, mikalat sa social media nga dunay hulagway sa usa ka bata nga namatay matud pa sa maong sakit ug giingong gi-lock down ang Brokenshire Memorial Hospital gumikan sa posibleng pagkalat niini gani dali kining mikalat nga impormasyon nga miresulta sa pagkaguliyang sa mga netizens ug sa Dabawenyos.
Subay niini, gipaniguro ni Dr. Julinda Acosta, technical division chief of Davao City Health Office nga ilang i-validate ang nagakalat nga impormasyon gani wala matud pay angay ikabalaka ang publiko gumikan ‘suspected case’ pa lamang kini ingon man wala silay ‘close contact’ sa maong kaso sa balatian.
“(Meningococcemia’s) mode of transmission is through droplet and not airborne. Kadtong close contact like family members nga nag care while sick ang patient will take the prophylaxis,” pagpasabot niini.
RadyoMaN Jason Amisola
