Roxas City, Capiz- Dalayon na nga ginbawian sang kabuhi samtang ginabulong sa ospital ang tatlo ka tuig nga si Honeyfel nga biktima sang pagpanglabo sang suspek nga si Nestor Beldia y Acuyong pasado alas 3 sang hapon sa Sitio Dulonan Brgy Tanza Norte Panay.
Ang biktima ang wala gid matabangan kag napatay alas kwatro kaina sang aga samtang ginabulong sa Roxas Memorial Provincial Hospital bangud man sa nagkatuhay nga mga kapilasan sini nga naangkon makaligad wala kaluoy nga ginlabo sang amu nga suspek.
Sa mahibaluan una na nga ginbawian sang kabuhi sanday Concepcion Celino y Baniel,70-anyos; Ramilyn Labto y Celino, 36-anyos kag Jaira Isabel Labto y Celino, apat ka tuig ang pang-edaron.
Patay man ang suspek nga si Nestor Beldia y Acuyong nga nagbato sa mga kapulisan nga nagresponde.
Samtang padayon pa nga ginabulong sa ospital ang duha pa gid ka mga biktima nga ginkilala kanday Telma Arabia y Bermejo, 74-anyos kag walo ka tuig nga bata nga ginkilala kay Prince Cyrel Celino nga nag-angkon sang pilas sa natuo nga abaga.
Suno sa imbestigasyon sang mga kapulisan, gulpi nga nagsulod sa poluy-an ang suspek kag hinali nga ginpanglabo ang mga biktima nga sanday Concepcion Celino, Ramilyn Labto kag Jaira Isabel Labto. Samtang matapos sini, iya man nga ginpanglabo ang mga persona nga iya masugat-an.
Suno sa imbestigador sang Panay PNP nga si PO2 Bryan Zen Bacay, posible nga ang depresyon bangud sa balatian nga prostate cancer kag pneumonia ang ginatudlo rason kun ngaa naghuramentado ang amu nga suspek.
