Budol-budol gang, nagpakuno-kuno nga manugbulong, nadakpan

Roxas City, Capiz – Nakahunong na sa karsel sang Roxas City PNP ang duha ka mga katapo sang budol-budol gang nga nagpakuno-kuno nga manugbulong kag gintunto ang ila pasyente sa Barangay 5, Roxas City. Ginkilala ang mga nadakpan nga suspek nga sanday Marging Magbanua kag Ibyang Dela Cruz samtang nakapalagyo ang duha pa nila ka mga kaupdanan nga sanday Agathon Magbanua kag Ma. Fe Magbanua.
Sa interview sang DYVR RMN Roxas sa biktima nga si Amybeth Enopia, nagpadulong ang apat ka mga persona sa balay sini sang nagligad nga semana agud suguran ang pagbulong bangud nagabatyag sang pagsakit sang tiyan ang biktima. Suno pa diri nga naghatag na sila sang una nga bayad nga naglab-ot sa P3,700. Liwat nga nagbalik ang apat ka mga suspek kahapon agud padayunon ang pagbulong sa biktima. Ginpahayag sang mga suspek nga may nagapangluyag nga dwendi sa biktima rasun nga nagasakit ang tyan sini.
Nagpangsukot sang P90,000 ang mga suspek agud matigayon ang kag tapuson na ang pagbulong apang P37,000 lamang ang masarangan sang pamilya. Ginbaton man sang mga suspek ang amo nga kantidad bangud nagapasugot man suno diri ang nagapangaluyag nga dwendi. Suno pa kay Amybeth Enopia, matapos nga magbayad sang nasambit nga kantidad, ginputos ini sa isa ka papel kag ginhampol sa iya tiyan bangud sa pagpati nga ini ang makapaayo sa biktima. Gindugang pa sini nga naghinyu ang mga suspek nga magpadulong sa simbahan agud magpangamuyo para mangin epektibo pa gid ang pagbulong apang nakamutik kag nakabatyag ang biktima nga daw ginatunto na sila. Natukiban sang biktima nga ang naputos nga kwarta sa nasambit nga papel ang kinumos na lamang nga mga papel.
Gilayon nga nagpadulong ang pamilya sang biktima sa Roxas City Integrated Transport Terminal kag nagpangayo sang bulig sa dispatcher agud lagson ang mga suspek. nakig-angut ang dispatcher sa driver sang sang van nga ginsakyan sang mga suspek kag gindulog ini sa Ivisan Police Station kag didto gin-aresto ang mga peke nga manugbulong. Gintur-over naman sa Roxas City PNP ang mga suspek kag nabawi sang biktima ang ila kwarta nga P37,000. Magluwas kay Amybeth Enopia may nauna na nga nabiktima ang budol-budol gang kun sa diin P177,000 ang nakuha sang mga suspek kag may isa pa gid nga target ang mga ini sa nasambit man nga barangay.

Facebook Comments