Buena Mano: ‘RMN MISSION 2020’ gidagsa

22

Davao City – Bisan pa man sa kalayo ug sa ka hilit sa lokasyon, wala kini nahimong babag alang sa managtiayong Francis ug sa iyang kapikas nga si Loreta, taga Sta. Maria, Davao Occidental aron motambong sa unang salga kun pag-arangkada sa ‘RMN Mission 2020’ nga gipahigayon sa Purok 1, Sitio Uyanguren Covered Court, Tigatto, Buhangin, ning dakbayan.

Sumala ni Loreta Linuwag Francis, 70 anyos kinsa kuyog ang banang si Carlito Francis, 73 anyos, kanunay na silang tigpaminawan sa DXDC ug karon lamang nakahigayon og tambong sanglit walay pamasahe kaniadto.


Saysay niini nga nanghulam pa gyud sila og plete aron lamang makabisita dinhi sa syudad sa Davao.

Gani, mapasalamaton si Nanay Loreta gumikan kay gawas nga nakabenepisyo kini sa libreng eye check-up, nakita pa gayud nila personal, nahimamat ug nahinabi usab ang mga kinaham nilang RadyoMaN anchors ug mga reporters kinsa sagad madunggan lamang nila ang tingog sa kahanginan.

Sumala sa Family Eye Care, partner sa DXDC ning maong public service undertaking, mokabat sa 100 ka mga parehong senior ug dili senior citizens ang nakabenepisyo sa target nga pagkab-ot sa ‘20-20’ vision sa mga taga-barangay.

Samtang mapasalamaton usab si Barangay Captain Lito Lapitan nga napili ang ilang barangay nga mamahimong beneficiary sa public service activity sa RMN Davao ug mipasalig nga andam ang ilang barangay nga makig-partner sa uban pang mga aktibidades sa sibyahanan alang sa katawhan sa Tigatto sa umaabot pang mga panahon sama na lamang sa ilang Founding Anniversary karong July puhon.

Matud ni RadyoMaN Misel Miral-Galve, Special Projects head sa DXDC, lauman ang daghan pang mga programa —public service man o kalingawan nga ilusad ug itanyag sa DXDC alang sa katagbawan ug kalingawan sa mga katawhan sa kabarangayan sa entero syudad.

RadyoMaN Jason Amisola

Facebook Comments