Davao City – Tinguha karon ni Davao City Third District Councilor Conrado Baluran nga mas mapabug-atan pa ang silot sa mga drivers nga magmaneho nga walay disiplina hinungdan sa ngilngig nga mga disgrasya sa kadalanan.
Segun ni Baluran, hangtud dili pahamtangan og mas bug-at nga silot ang mga abusadong drivers, dili sab matuldukan ang duguong disgrasya nga mahitabo matag karon ug unya diha sa kadalanan.
Gikumpirma ni Baluran nga nakigkita na kini kang Assistant City Administrator Tristan Dwight Domingo aron iplastar ang ordinansa nga ipanday sa Konseho aron masilotan ang pabaya nga driver.
Sa datos nga nahipos sa committee on Transportation nga gipamunoan sa konsehal gikan sa CTTMO, nag-una ang walay helmet ug ikapito ang driving without driver’s license sa mga bayolasyon sa dakbayan.
Giingon sa konsehal nga kasagaran sa mga walay helmet ug walay mga lisensiya mga abusado ug sagad nalambigit sa kuyaw nga disgrasya hatud sa ilang kakulang sa disiplina sa pag-drive.
Busa, mas maayong trataron nga kriminal ang mga drivers nga musupak sa helmet law ug magdrive nga walay lisensiya aron matagam sa presohan tungod sa peligro nga ilang gimugna sa mga manakayay ug sa publiko.
Buot sab ni Baluran nga pa-aksyonan sa LTO Davao Region kining mga truck ug mga sakyanan nga dugay na ug daghan nang diperensya ug lakip ang pag-phase out sa surplus nga mga behikulo.
Ang kondisyon sa maong mga sakyanan prone na sa mga disgrasya sama sa nahitabo sa Matina Pangi diin mikagar ang break sa Forward truck resulta nga mibangga sa poste nga gikamatay sa upat ka mga sakay niini.
RadyoMaN Joel Viray
