BACOLOD CITY – Ginklaro ni Police Station 1, station commander Police S/Insp. Leo Estopa nga nahatagan na nila sang aksyon ang problema sa alsa palda sa Bacolod City Public Plaza.
Suno kay Estopa nga 4 tubtub 5 ka adlaw na humalin nga nagpatuman ang Police Station 1 sang saturation sa mga kababaenhan sa plaza nga naga-libud sang ila lawas, particular ang mga “bugaw.”
Ginpahayag ni Estopa nga gintipon nila ang tanan nga mga complaints kag nagpatigayon sang identification tubtub nga makilala ang mga suspek.
Pahayag ni Estopa nga kabahin sang ila ginhimo nga aksyon amo ang pagpadala sang tropa sang pulis sa pagbantay sa plaza sumugod las 9:30 sang gab-i subong man ang ila pag-coordinate sa natungdan nga ahensya sang gobierno.
Sang nagligad nga Masskara 2017 suno kay Estopa may nadakpan sila nga 3 ka bugaw kag ini ang ila gin detain kag napasakaan man sang kaso.
Sa bahin sang mga menor de edad, suno kay Estopa nga sadtong Martes may gin-operate sila upod ang WCPD kag may nadakpan sila partikular ang mga naga-higda sa sidewalk.
Angut sini, padayon ang reminder ni Estopa sa publiko ilabi na sa mga lalaki nga kon mag labay sa plaza partikular sa kagab-ihon, indi gid magkumpyansa kag mag-kagat sa padugi sang mga babayi, alsa palda man ukon bugaw./dyHB BACOLOD
