ZAMBOANGA CITY—Este dia esperanzao el maga pulis del Vitali Police Station na encabesamiento del hefe si Chief Insp. Joseph Lim ay man inquest na Fiscalia conel un padre de familia quien ya hace halabas de bolo consu esposa y anak y ya sindi pa con el diila casa na Sitio Tigbao, Licomo del Biernes por la noche.
Si Lim ya nombra con el suspechao como si Roderick Guevara y Mendoza mientras el maga victima amo su esposa si Josephine Guevara, 39 y diila anac si Julius, onse años de edad.
El maga victima sostene maga tajo na diila cuerpo y dayun ya lleva corre na hospital.
Con Roderick ya puede aresta el maga pulis durante el que se llama follow-up operation.
Maga pulis ya puede tambien recobri na posesion di Roderick el un bolo que amo le ya usa durante el incidente.
El pulis ya habla que si Roderick ya sindi pa con el diila casa despues le de tahyar consu esposa y anac.
Na imbestigacion ta aparese bien buracho si Roderick ya bolbe na casa y derepente ya lang este ya empsa tahya-que-tahya con su esposa y anac y ya sindi pa con el diila casa que ya causa para quema.
Si Lim ya habla que el maga caso ay recomenda sila na Fiscalia contra con Roderick amo el frustrated parricide (dos) y arson. – Dan Toribio
