Gipakisayud sa Provincial Veterinarian nga nagpabiling luwas ang Bukidnon gikan sa African Swine Fever kon ASF.
Sa interview sa RMN DXMB Malaybalay ngadto kang Provincial Veterinarian Dr. Nancy V. Diez gibutyag niini nga gikonsidera sa karon ang Bukidnon nga anaa sa green zone ug aktibo ang ilang surveillance diha sa mga boundary barangays kung aha nagapahigayon sila sa blood sample extraction sa mga baboy, sa pag-abag sa Regional Office ug sa Northern Mindanao Hog Raisers Association (NorMinHog).
Gisguyot ni Dr. Diez sa mga namuhi ug baboy nga kung pwede nang ibaligya o e-disposed ang ilang mga gibuhing baboy, ibaligya na kini samtang mapuslan pa.
Samtang gitambagan usab niini ang mga namuhi ug baboy nga magpalista na sa barangay para ma-enroll sa livestock insurance aron mahatagan ug ayuda kung ugaling makasulod gayod ang ASF.
Nasayran nga dinhi sa lalawigan pormal na nga natukod ang Bantay ASF sa Barangay niadtong Pebrero 12, 2021, atol sa pagbisita dinhi ni Secretary William Dar, sa Department of Agriculture. Gipaningkamotan sa Provincial Veterinary Office (PVetO) nga makakuha ug report gikan sa mga gitudlo nga Barangay Biosecurity Officers sa tuyo nga masusi ug sayo kung adunay mabantayan nga problema kalabut sa ASF. Ang early detection ug dinalian nga pag-aksyon pinaagi sa hiniusang lihok sa gitahasang task force mao ang gipaningkamotan sa probinsya sa Bukidnon.
