Bukidnon-Talaingod road dili pa pwede sa dagkong sakyanan

Davao City – Giabisohan karon sa Talaingod Municipal Police Station (MPS) nga gamiton una ang alternatibong ruta gawas sa Bukidnon-Talaingod road human nga naguba ang karsada sa portion sa Barangay Kalagangan, Bukidnon tungod sa landslide.

Sa interbyu sa DXDC RMN Davao kang Police Staff Sergeant Esralita Compuesto, personahe sa Talaingod MPS, mga light vehicles pa lang ang pwede makaagi sa temporaryong dalan nga gihimo kilid sa naguba nga karsada.

Ang mga dagkong sakyanan o trucks mamahimong muagi una sa Davao-Bukidnon route, samtang wala pa naayo ang dalan.

“Light vehicles lang gyud siya (ang allowed). Gina-discourage gyud ang mga dagkong truck kay imbes nga gihinay-hinayan sa pag-ayo, dili na hinuon siya tungod kay makankan naman pud siya. Mo-down na man pud ang kadtong gitambak nila,” sulti sa pulis.

Sa pagkakaron, wala pay opisyal nga pamahayag ang Department of Public Works and Highways (DPWH) kanus-a target nga mahuman ang pa-repair sa maong naguba nga karsada.

RadyoMaN Kirby Manzon