Piñan, ZDN- Hangtod karon wala pa maila ug blanko pa gihapon ang kapulisan sa lungsod sa Piñan human sa nahitabong pagpang labni sa usa ka kwentas ni Shiela Sabandal, nagpuyo sa Brgy. Pob. South, Piñan, ZDN sa miaging adlaw, 1:15PM.
Base sa nahipos nga impormasyon gikan sa PNP Piñan, matod pa ang bulawan nga kwentas sa biktima nagtangag kini ug pendant nga mokantidad sa 21mil kapin kun kulang ang gilabni sa iyang liog sa duha ka wala mailang snatchers.
Niadtong higayona ang biktima anaa sa tindahan duol sa PNHS sa dihang kalit lang miabot ang duha ka mga lalaki nga nagpaka aron ingnong kostumer, matod pa miduol kini kaniya ug gilabni ang kwentas dayong sakay sa motorsiklo padulong sa wala masayring direksyon.
Gibutyag sa imbistigador nga si SPO2 Libsy G. Poracan nga naka helmet ang drayber samtang ang angkas walay sampong sa iyang nawong pero maglisod pa sila pag ila.
Nakuhaan kini ug CCTV footage human nga miagi sa main road sa maong lungsod pero hanap ang mga letra ug number sa plaka sa motor ug wala sab kaila ang biktima bisan paman na klaro sa cctv footage ang nawong sa angkas.
Sa pagkakaron igo nalang sa pagpatala sa kapulisan ang biktima sa iyang gidangatan.
