El mga bumbero del ciudad de Zamboanga ya conduci enantes aga con el diila primer “Indoor Drill” que parte del primer derectiva del nuevo instolao City Fire Marshall F/Supt. Jhufel Brañanola.
Durante el actividad el mga bumbero ya dale mira el diila mga saver quilaya carga, emplasta y rollya mga firehose, subi y abaha na escalera, usa de pronto con el diila fire gear y medical response en tiempo de quema.
Si Brañanola ya habla cay ta manda le conduci este clase de programa para por lumenos fuede mantene el mga bumbero el diila mga saver y el de pronto responde na cada insendio sila ta responde.
Bien importante asegun este actividad porcausa cay necesita capaz el cada bumbero y hinde perde wisyo si porjemplo ya tupa que na diila jurisdiccion el quema ta ocuri.
Este derectiva de Brañanola ta replica contodol mga bumbero na cada fire station que chene na entero ciudad de Zamboanga. *– Bhong Simbajon/RMN News*
