Bunal Gang: Nagapanimalos lang?

Davao City – Pagpanimalos ang gilantaw karon sa kapulisan nga motibo sa nagapanghitabong pagpamunal sa mga naka motorsiklo sa pipila ka areas sa Davao City.

Kini subay sa kamatayon sa usa ka roof installer sa Brgy. Bucana kinsa miuwang lamang sa miulbong riot sa maong area.

Gibutyag ni Davao City Police Office (DCPO) spokesperson Capt. Nolan Tagsip nga human nadakpan nila ang mga membro sa Resbak Gang nga nalambigit sa maong riot, giangkon sa mga membro sa grupo nga duna silay kaatbang gani gipanubayan kini nila ug wala na mihatag pa og dugang detalye aron dili makaikyas.


Una nang gilimod sa DCPO nga dili sila ang nagpaluyo sa nagapanghitabong pagpamunal nunot sa mikatag nga impormasyon sa social media nga dunay usa ka biktima ang nakaila sa giingong nagapamunal nga usa ka pulis sanglit uyab kini sa iyang barkada.

Pagpasabot sa maong tigpamaba nga dili binuhatan sa kapulisan ang manakit sa publiko sanglit responsibilidad nila nga protektahan kini batok sa mga dautang lihok.

“We are the law enforcer, we serve for right and protect not the other way around,” pagpasabot niini.

Gikanayon ni Tagsip nga usa kini ka isolated case gani ilang ginadoble ang pagpakusog sa ilang mga programa sama sa Ronda Patrol ug Sagop Kabataan aron malikay sa susamang nagapanghitabo.

Padayon usab gi-awhag sa opisyal ang mga nabiktima nga mupatim-aw ug pormal nga mu-file og reklamo aron mas mapalawman pa ang maong insidente.

Sa pagkakaron, usa pa lamang ang pormal nga mireklamo sa Sasa PNP gawas sa pipila ka mga migula nga reklamo ug kabalaka diha sa social media.

RadyoMaN Jason Amisola

Facebook Comments