Davao City – Giduso karon sa Southern Mindanao Bus Operators Association (SYMBOA) ang bag-ong sistema sa pagbayad sa mga pasahero sa bus nga mikuha og suporta sa kadumalahan sa Davao City Overland Transport Terminal (DCOTT).
Sa pakighinabi sa DXDC RMN Davao kang Aiza Usop, DCOTT manager, gibutyag niini nga una nang gi-propose kaniya sa presidente sa SYMBOA nga si Jerry Sy, ang paggamit og ‘beep card’ o usa ka ATM sama sa ginagamit sa Metro Rail Transit (MRT) ug Light Rail Transit (LRT) sa kaulohan sa pagbayad sa sakyanan inay nga cash.
Saysay ni Usop nga gipasabot sa SYMBOA president nga pinaagi sa maong sistema, gawas nga malikayan ang kurapsyon sa mga konduktor, masiguro usab nga mabalik ang sukli sa mga pasahero ug posible ma-accomodate ang mga manakay subay sa seating capacity sa sakyanan.
“Maoy ilahang gusto nga mahitabo, nga i-impelement pud nila, nga ang pasahero pwede nga naa siya atong ATM card nga pagsakay sa maong bus, ilaha na lang tong i-punch ug otomatik didto ma-deduct ang ilang pamasahe.” segun niini
Sa pagkakaron, matud pa ni Usop nga gisugdan na ang maong sistema sa pipila ka bus sa DCOTT partikular na ang ruta padulong sa Malita, Davao Occidental apan kini gipa-ilalum pa sa obserbasyon ug ginatun-an kung nindot ug maayo ang dagan sa maong modernong sistema.
RadyoMaN Kirby Manzon
