ILOILO CITY – Nagapang-alang-alang ang Iloilo Business Club (IBC) sa plano nga idumili ang pagbaligya sang makahulubog nga ilimnon makalipas ang ala una sang kaagahon.
Suno kay Lea Lara, Executive Director sang IBC ginakabalak-an niya ang mangin impact sini nga plano sa turismo.
Pahayag ni Lara, primary driver sang economiya sang syudad amo ang turismo kag maapektuhan ini kun ipatuman ang alcohol curfew sa mga restaurant, hotels kag iban pa nga mga establishments.
Dapat man i-consider suno kay Lara ang tuhay nga working hours sang mga call centers nga nagatapos ang trabaho sa kaangahon kag ang ila sundown nagasugod alas tres sang aga.
Sa ordinansa nga ginaduso ni Councilor Joshua Alim, indi na pwede makabaligya sang makahulubog nga ilimnon pag-abot sang ala una sang kaagahon nga nagasakop pati sa mga tyangge sa barangay.
Pahayag ni Lara, nagalaum ang business sector nga konsultahon sila antes ipasar ang ordinansa. /// Photo from web
