Davao City – Milambo ang business sector dili lang sa syudad sa Davao apan sa tibuok isla sa Mindanao sa unang tulo ka tuig sa termino ni Pres. Rodrigo Duterte.
Kini maoy gibutyag ni Davao City Chamber of Commerce & Industry, Inc. Pres. Arturo Milan atol sa gipahigayong Kapehan sa Davao karong adlawa kinsa miingon nga gumikan sa kanunay’ng pag-uli ni Pangulong Duterte sa syudad ang usa sa rason nganong mas naila ang isla sa Mindanao.
Gipamatud-an kini ni Milan human gibutyag nga adunay rubber manufacturing business nga gikan sa Guandong China ang nagaplano nga magbalhin ug magpatukod og pasilidad sulod sa syudad sa Davao.
Segun niini nga tungod sa kakulangon sa trabahante gumikan sa mahal nga labor ang usa sa rason ngano kini plano ibalhin.
Gani naglaum ang presidente sa DCCCII nga mas mudaghan pa oportunidad sa syudad sa Davao ilabi na sa bahin sa agrikultura ilabi na nga adunay mga Malaysian investors ang nagaplano nga magpatukod og imprastraktura sa pumpoil.
Sanglit gihatagan niini og grado nga 7/10 si Pres. Duterte gumikan sa mga gikinahanglan pa og kalamboan ug naglaum nga magpadayon ang kampanya sa kabag-ohan ilabi na ang pagsugpo batok kriminalidad, kapobrehon ug kurapsyon ingon man sa nagapadayon’g Build Build Build Program.
Samtang ginalantaw ni Prime Philippines Managing Director and CEO Jet Yu ang Davao City isip ‘first class business city’ sa dili madugay gumikan sa klaro’ng paglambo niini.
RadyoMaN Jason Amisola
