Buy-bust, gende abduccion

ZAMBOANGA CITY–Ya clarifica el hefe del Vitali Police Station si Chief Insp. Joseph Lim que buy-bust operation sila ya conduci na Tumaga anoche y nohay abduccion el ya sosede como de mas temprano istorya que ya man calayat.
Si Lim ya habla ya tene sila que conduci el buy-bust operation encontra conel un alegao notorioso drug pusher nombrao como si Mashur Mohammad y Magbanua, alias Sol, 18, de Aurora Village, Guiwan.
El operacion ya sosede na Tumaga Porcentro donde ya confiscxa na posesion di Mohammad el dos paquete de shabu y P200 marked money.
Asegun con Lim ya aresta sila con Mohammad despues este ya entrega el shabu conel police undercover en cambio del marked money.
Pero ciendo nohay sila posas, amaro sila ya usa para amara con Mohammad y posible este el rason si porque ya man calayat el istorya que abduccion el soseso.
Asegun con Lim mientras encamino sila para na Vitali Police Station ya tene pa que aguanta canila el maga soldao del Philippine Marines quien ta conduci checkpoint na barrio de Guisao donde ya explica pa le conel maga soldao hablando maga pulis sila y gende kidnapper.
Mas de ese, si Lim ya habla que ta prepara ya sila el maga proprio caso que planta na corte encontra con Mohammad. — Dan Toribio