Naglab-ot sa 63 ka sachet sang suspected shabu nga ginabanta nagabalor 70 mil tubtub 90 mil pesos ang narecover sang mga katapo sang Regional Drug Enforcement Unit ukon RDEU sa ginhiwat nga buy bust operation mga alas 9:20 sini nga gab-i sa Lisandra Subdivision, Hibao-an, Mandurriao.
Ginpahayag ni Police Sr. Inspector Kenneth Bermejo sang RDEU nga 9:20 sang mag-transact ang poseur buyer sa subject nga si Melbert Dumanillo, alyas Praning, 25 anyos, tumandok sang Desamparados, Jaro apang temporaryo nga nagapuyo sa nasambit nga Subdivision.
Suno kay Bermejo nga wala sang stock si Dumanillo sang ginbaklan kabangdanan nagtawag ini sa iya contact nga si Marymae Avelino, 35 anyos sang Cubay, Jaro nga nagkuha naman sang supply sa Barangay Calubihan kag nagdul-ong sang stock sa Lisandra Subdivision.
Pag-abot sa Subdivision, isa ka minor de edad nga lalaki ang ginsugo nga magdaho sang illegal nga druga sa poseur buyer.
Bangud sini, arestado sanday Dumanillo kay Avelino lakip na ang menor de edad nga lalaki.
Ginpahayag pa ni Bermejo nga si Melbert Dumanillo ang ginatudlo nga supplier sang ilegal nga druga sang ila man nadakpan sa buy bust operation sa Cabatuan nga si alyas Maurice.
