BACOLOD CITY – Balik normal na ang byahe sang barko Bacolod City kag Negros Occidental bisan pa ang kaiping sini nga mga lugar ang ginaigo sang Bagyong Urduja.
Suno kay Bacolod Coastguard head Jimmy Oliver Vingno, las 5 sang hapon ginpahanugutan na nila nga makabyahe ang RORO sa Dumangas Port – Bacolod Bredco Port vice versa.
Sa report sang Office of the Civil Defense, normal ang sitwasyon sa Bacolod kag Negros Occidental.
Pila naman ka dalanon ang ginbaha sa Pandan kag Libertad Antique. Portion sang Tulingob, Nabas road sa Aklan ang nagkalaguba sa diin naglab-ot sa 26 ka barangay ang ginbaha ukon may 161 ka pamilya. Masobra naman sa 1,000 ka mga pasahero ang nastranded sa Caticlan Port kag 50 ka mga salakyan.
Sa Capiz, may 89 ka barangay ang ginbaha ukon 151 ka pamilya ang apektado sa diin ang Tumalalod Road sa Mambusao ang indi maagyan sang mga magagmay nga salakyan.
Sa pinakaulihi nga weather bulletin, las 8 subong nga gab-i ginpaidom sa Tropical Cyclone Warning Signal No. 1 ang Southern part of Mindoro provinces, Romblon, Palawan, Aklan kag Northern Antique.
