Davao City – Ang droga walay gipili nga biktima bisan kinsa prone kaayo sa tentasyon sa pagtilaw hangtud mamahimong adik nga kung dili kahithit, magkara-kara sa pagpangita og pamaagi aron lang maka-iskor sa bisyo nga dangan sa kaugmaon sa nasud ug sa sunod pa nga mga henerasyon.
Matud ni Davao City Anti Drug Abuse Council (CADAC) Head Ronald Rivera, bisan kinsa puwede mahimong biktima sa droga ug labaw na ang mga adunahan sama sa mga artista nga nalakip sa listahan kun drug watch list sa PDEA karon tungod kay aduna man silay kapasidad sa pagpalit sa kontrabando.
Gidasig ni Rivera ang publiko hilabi na sa mga panatiko ug mahilig mag-idolize sa mga showbiz personalities nga pilion gayud ang mga artista nga ilang i-admire ug himoong sumbanan aron dili usab sila ma-impluwensiyahan sa bisyong makaguba sa nindot nga kinabuhi ug imahe.
Aron makabantay ang katawhan sa mga artista nga gahithit ug gapayuhot og ilegal nga droga, dakung pabor ang CADAC nga i-publiko ang pangalan sa 31 ka mga well-known showbiz industry artists aron sa ingon, undangon na nila ang pag-idolize sa mga artista nga lulong na diay sa droga sama sa shabu, cocaine, marijuana, party drugs sama sa Ecstasy ug uban pa.
Gi-aghat usab ni Rivera ang PDEA nga pasakaan na og tukmang kasong may paglapas sa balaud sa droga ang mga artista nga anaa sa ilang listahan aron mahukman na gilayon sila sa korte kung tinuod man nga involved sila sa droga.
RadyoMaN Joel Viray
