Mitahan na ngadto sa iyang mga kaubang sundalo ang cadre sa Civilian Armed Forces Geographical Unit (CAFGU) sa usa ka detachment sa Lanao del Sur kinsa namusil-patay sa mga sundalo sa 55th Infantry Battallion, human ang halos usa ka bulan nga pagtago-tago.
Matud pa ni Captain Clint Antipala, acting Public Affairs Officer sa 1st Infantry Division, gi-turn over si Corporal Nao Mohammad Lassam kagahapon ngadto sa Marantao Police Station sa Lanao del Sur human siya mi-surrender niadtong Enero 12 ngadto sa mga tropa sa 10th ug sa 1st Infantry Divisions didto sa Tagum City.
Kung kahinumduman nga gi-straffing ni Lassam ang grupo sa mga sundalo samtang nagpahigayon og clearing operation didto sa Sitio Banisilan, Barangay Bandaraingud sa lungsod sa Pagayawan, Lanao del Sur niadtong Disyembre 24, nga mi-resulta sa kamatayon sa duha ka mga sundalo nga sila si Second Lieutenant Mark Linne Banua ug Sergeant Jhanjihan Carumba.
Laing lima ka mga sundalo ang samaran sa maong pagpamusil.
Nagpahigayon og clearing operation ang mga sundalo niadtong higayona human ang pagpang-ambush sa hepe sa Binidayan Municipal Police Station sa lungsod sa Binidayan niadtong Disyembre 23 sa susamang lugar.
Ang maong pagpang-ambush mi-resulta sa kamatayon ni Police Executive Master Sergeant Amen Lucman Macalangan ug sa iyang driver nga si Ramel Pangcatan.
Miingon si Antipala nga nag-atubang si Lassam sa duha ka mga counts sa kasong murder, serious physical injuries ug multiple frustrated murder cases gi-file na kagahapon sa buhatan sa Provincial Prosecutor sa Marawi City.
