Sa interview sa DXDC RMN Davao sa CAFGU nga si Jonnel Ubat, 26 anyos, nagpuyo sa maong Barangay, giingon niini nga nadamay lamang kini sa kasong pagpatay nga gihimo sa iyang kauban nga si Jan-Jan Ubat.
Depensa ni Jonnel, iya lang gipunit ang kutsilyo nga gigamit sa pagluba ni Jan-Jan sa biktima nga si Allan Otto, 38 anyos, laborer ug residente sa samang lugar.
Migawas sa imbestigasyon sa Marilog Police Station-Homicide and Arson Section nga gi- dunggab sa makapila ka higayon ni Jonnel ang biktima ug mitabang si Jan-Jan ug ang lain pa nilang kauban nga si Jessie Ubat nga hugot usab milimod sa maong krimen.
Nasayran nga parehong anaa sa sayawan sa Sitio Suwalon sa maong lugar ug nag-inom ang mga suspect ug biktima hangtud nga nagkabikil ang biktima ug mga suspetsado.
Patay on the spot si Otto gumikan sa daghang samad dinunggab, samtang ang mga suspect abtik nga nanibat, kini subay sa testimonya sa Barangay Tanod nga si Boyet Losaria.
Alas 12:30 sa udto, mitahan si Jonnel ug Jessie sa mga operatiba sa gilusad nga manhunt operation sa Sitio Talisay, Barangay Suawan ug pipila ka gutlo ang nakalabay nasikop si Jan-Jan .
Ang tulo ka mga suspetsado anaa sa custodial facility sa Marilog Police Station, samtang patay’ng lawas sa biktima anaa sa Angel Funeral Parlor sa Calinan, Davao City.
RadyoMaN Joel Viray
