CAFGU namaligya og droga, nadakpan

Davao City- Nadakpan sa gilusad nga buy-bust operation sa Philippine Drug Enforcement Davao Region, Davao De Oro Provincial Police Office ug sa Nabunturan Municipal Police Station ang usa ka aktibong sakop sa Citizens Armed Forces Geographical Unit (CAFGU) human namaligya sa gitohoang shabu sa Purok 3, Barangay Mainit, Nabunturan, Davao De Oro bandang 7:30 sa miaging gabii.

Giila ang dinakpan nga mao si Jerry Bation, 39 anyos, minyo, CAFGU, ug nagpuyo sa naasoy nga dapit.

Giposasan ang suspek human gitunol niini ang usa ka pakete sa gitohoang shabu nga mutimbang og usa ka gramo ug nagkantidad og 12,000 ka pesos ngadto sa pulis nga nagsilbing poseur buyer.

Sa pagkapkap sa mga otoridad ngadto kaniya, narekober ang laing upat ka pakete sa shabu nga mutimbang og 2 gramos ug dunay kinatibuk-ang market value nga 13,600.

Si Bation, gikonsidera nga Regional Targeted Drug list Personality Number 10 sa kampanya kontra droga sa probinsiya sa Davao de Oro.

Kasong may kalapasan sa section 5 ug 11 sa Republic Act 9165 kon Comprehensive Dangerous Drugs Act of 2002 ang gipasang-at nga kaso batok sa badlungon nga CAFGU.

RadyoMaN Joel Viray