Dipolog City – Prisohan karon ang gidyutihan sa usa ka CAFGU human nadakpan sa nirespondeng mga pulis sa nahitabong kaguliyang sa Fat Cat Resto Bar mga alas 2:30 kaganihang kadlawon didto sa may dalan Magsaysay, Barangay Central dakbayan sa Dipolog.
Ang dinakpan naila nga si Jessie Tandoy Janolino, 25 anyos, ulitawo, usa ka Cafgu ug lumulupyo sa Barangay Del Pilar, Lungsod sa Piñan, lalawigan sa Zamboanga del Norte.
Subay sa nahipos nga report sa Dipolog City Police Station nasayran nga sila SPO1 Jose Montallana, PO3 Micheal Cuenca uban sa laing mga polis daling niresponde sa nadawat nga tawag sa tagdumala sa maong Resto Bar nga sumala pa dunay lalaki armado sa armas de fuego kinsa nanion sa ilang mga kustumer.
Pagabot sa kapolisan sa dapit, abtik nakasibat ang supek sakay sa single motor mio dunay temp. plaka numero 090110 hinungdan gilusad gilayon ang paggukod ug didto kini nakorner sa dalan Malvar, Central Barangay.
Naimbargo sa kapolisan ang usa ka kalibre 45 norico handgun serial number 201904, usa ka magazine kargado ug lima ka mga buhing bala, id niini nga Cafgu Active Auxiliary (CAA) nga na-assign 5th Infantry Brigade Del Pilar Piñan, Zamboanga del Norte samtang pakyas sab makapakita sa insaktong dukumento sa armas ang dinakpan.
Atol sa pag-aresto, nidangop sab sa buhatan sa Dipolog PNP ang mga complainant nga sila Elorde O. It-it, Ricardo L. Tizon, Pakam Halipa P. Pakam ug Randon Paculba nagtumbok sa dinakpan nga maoy nition ug pistola kanila sulod sa maong Resto Bar. (r.m)
