Davao City – Epektibo 12:01 kagahapon sa tungang gabii, General Community Quarantine (GCQ) na ang tibuok Davao Del Sur gikan sa Enhanced Community Quarantine human wala kini malakip sa COVID-19 ‘high risk area.’
Sugod kagahapon, balik biyahe na ang mga pedicab ug mga bus ug abli na usab ang mga dagkung establisiyemento sama sa mga malls apan walay labot ang mga merkado-publiko.
Depensa ni Gov. Douglas Cagas nga lisod masunod ang social distancing sa merkado ug kuyaw nga basin mokuyanap pag-usab ang virus maong wala na gilakip ang mga palengke sa pag-abli.
Ubos sa GCQ, istrikto gihapong gi-imposar ang pagsuot og facemask,social distancing,limitasyon sa pagsakay og mga pasahero ug uban pang kalihukan diha sa pampublikong lugar.
Puwede nang maglatas-latas sa ubang mga munisipalidad ug syudad ang iyang katawhan basta makasunod lang sa mga reglamentos nga gipatuman gihapon sa ilawom sa GCQ.
Dili makasulod sa probinsiya ang mga katawhang gikan sa mga lugar nga nagpadayon ang ECQ sama sa Davao City ug North Cotabato gumikan COVID-19 cases apan ang Davao Occidental puwede rang makasulod sa Davao Del Sur.
Magpabiling sirado ang pultahan alang sa mga taga-Davao Del Sur nga na-stranded sa ubang mga dapit sama sa syudad sa Davao nga ‘high risk’ gihapon tungod sa makatakod ug makamatay nga sakit.
Busa, tambag ni Cagas ngadto sa mga naabtan og lockdown sa ubang lugar nga magpabilin ug dili na lamang una mopauli ug paabotong mahuman ang extended ECQ karong May 15.
RadyoMaN Joel Viray
