Cagas: Pag-abli sa Davao boundary angay tukion

60

Davao City – Dili uyon apan dili sab supak si Davao Del Sur Governor Douglas “Dodo” Cagas sa pag-abli sa regional boundary sa rehiyon onse aron ang mga taga-laing rehiyon makasulod na sa bisan asang dapita sa rehiyon.

Alang kang Cagas, mas maayo paabuton na lang ang petsa 31 karong bulana ug mahuman na ang implementasyon sa General Community Quarantine ug dinha na hisgutan kung angay na bang ablihan o dili pa ang matag boundary sa rehiyon onse.


Kuyaw matud pa kon maglahos-lahos og desisyon ug walay himoon nga konsultasyon ug pagtuki ang mga lideres sa rehiyon kay basin sa pag-abli sa boundary mao pa unya kini ang hinungdan nga masudlan og mga magpositibo sa COVID-19 ug mutaas na hinuon og maayo ang kaso sa maong sakit.

Ang mahinungdanon sa gobernador karon mao ang paghinay-hinay og balik sa operasyon sa pipila ka industriya ug mga negosyo nga kapin duha ka bulan sab nahunong tungod sa implementasyon sa Enhanced Community Quarantine aron mapanalipdan ang katawhan gikan sa makamatay nga balatian.

Padayong gi-awhag ni Governor Cagas ang mga Dabawenyo nga makanunayon batasanon ang pagsuot og facemask, i-obserbar ang physical distancing, ug pagsunod sa uban pang guidelines aron ang kalbaryo ug krisis nga gisagubang sa katawhan nga pandemic karon hingpit nang mahuman.

RadyoMaN Joel Viray

Facebook Comments