Davao City – Gikumpirma ni Davao Del Sur Governor Douglas “Dodo” Cagas nga nag negatibo na sa 2019 corona virus disease kon COVID-19 ang usa ka frontliner sa Davao del Sur Provincial Hospital subay sa resulta nga gipagula kagahapon adlawa.
Segun ni Cagas, usa ka lalaki nga nag-edad og 30 anyos ang gi-admitar sa ospital sa miaging mga semana human nakitaan kini og sintomas sa COVID-19 apan nasuta sa resulta nga negatibo ang maong frontliner sa balatian.
Bisan tuod og gawasnon na sa COVID-19 ang Davao del Sur, apan dili gihapon magkumpiyansa ang gobernador ug buot pa niyang pahugtan og maayo ang pagbantay sa probinsiya aron dili gayod makatapot ang virus sa ilang dapit ug niini mamintinar ang maayong record isip COVID-19 free sa tibuok rehiyon onse.
Gibutyag sa abogadong gobernador nga kung siya lamang ang pabut-on mas maayo magpabilin ang rehiyon sa Enhanced Community Quarantine nungka ipailawom sa Modified General Community quarantine aron dili maluagan ang protocol sa pakigbatok sa COVID-19.
Ang pagpahugot og istrikto nga guidelines ang epektibo nga pambatok sa COVID-19 sanglit ang kagaw dili makita busa walay luna ang pulong nga relaks diha sa pagbantay aron sa ingon dili mahitabo ang gikahadlokan nga ‘second wave’ pandemic sa nasud.
Matud ni Cagas, ang iyang gahi nga barugan sa Enhanced Community Quarantine nagpanukad sa pamahayag ni Pres. Rodrigo Duterte ug sa kalibutan sa posibilidad nga mulabyog pa hangtod sunod tuig ang COVID-19 crisis tungod sa kawad-on sa bakuna karon.
RadyoMaN Joel Viray
