*Nakaalerto karon ang Cagayan de Oro City Police Office kon COCPO ning unang adlaw sa pag-abri sa klase sa mga pampublikong tunghaan.*
*Matud ni COCPO spokesperson Police Supt. Mardy Hortillosa, nga nakabantay karon ang kapolisan sa syudad pinaagi sa police assistance desk nga maoy duolan sa mga magtutudlo ug ginikanan, ilabina niadtong mga tinun-an nga nagkinahanglan og tabang. *
*Dugang pa ni Supt. Hortillosa, nga kung walay police assistance desk ang usa ka tunghaan gumikan sa kawalay luna tungod sa kapiot niini, gisiguro usab sa COCPO nga aduna gihapoy polis nga nakabantay sa tunghaan.*
*Gibutyag usab sa maong opisyal nga nakabantay gihapon sila sa mga pribadong tunghaan, apan mas nakapokos sila sa mga publiko ilabina nga wala kini mga security guard nga nakabantay.*
*Gisaad usab niini nga magpadayon kini hangtod maka-adjust na ang mga tinu-an sa ilang pagtungha ug dili na kaayo mamroblema sa pagawas ug sulod sa tunghaan lakip na ang pagtabok sa kadalanan.*
