Davao City – Angayang tabangan inay palagputon sa pwesto si Health Secretary Francisco Tiongson Duque III ilabi na diha sa pakigbatok sa coronavirus disease kun COVID-19 karong panahona.
Sumala ni Tibungco Barangay Captain Merjade Deles-Calvo, dayag nga naningkamot gayud si Duque kutob sa iyang mahimo apan dili lamang gayud niya madeparahan ang tanang concerns ug dagkung suliran diin nagkinahanglan kini ug tabang sa tanan.
Matud ni Calvo, daku ang pagsalig ni Pres. Rodrigo Duterte ngadto sa controversial embattled health chief bisan pa man tuod sa bag-ong panawagan karon sa 14 ka mga senador kinsa nipasar sa Senate Resolution No. 362 nangayo sa iyang hinanaling pagkanaug sa pwesto gumikan sa huyang nga liderato panahon ning maong pandemic.
Pirmado sa mosunod nga mga magbabalaud ang Duque ouster move: Senate President Vicente Sotto III, Senate Majority Leader Juan Miguel Zubiri, Sonny Angara, Nancy Binay, Grace Poe, Joel Villanueva, Francis Tolentino, Imee Marcos, Manny Pacquiao, Sherwin Gatchalian, Ronald dela Rosa, Ramon Revilla, Jr., Lito Lapid ug Panfilo Lacson.
Gipasabot usab ni Calvo nga kritikal karon ang pagtinabangay sa mga opisyales sa gobyerno inay nga magkasungi aron sa ingon, molampos kita sa pakigbatok ning naasoyng makamatay’ng balatian nga wala pa gihapoy vaccine kun bakuna nga na-develop ang mga medical experts sa kalibutan karon.
RadyoMaN Bernard Pantallon
