Davao City – Usa ang Barangay Tibungco sa mga barangay sa dakbayan sa Davao nga nakatala og kaso sa mga batan-ong babaye nga sayo naburos kun nakasinati sa gitawag nga early pregnancy.
Sumala ni Tibungco Barangay Captain Meljade Calvo, sa ilang barangay ang Relocation Area ang adunay pinakadaku nga populasyon ug sa mao nga dapit usab natala ang taas nga kaso sa early pregnancy.
Matud ni Calvo, ilang na-determinar ang pinaka ugat-hinungdan nganong sayo maburos ang ilang mga batan-ong babaye.
Nasuta ni Calvo nga ang pagsi-aw sa early pregnancy cases kun incidence sa iyang barangay may kalabutan sa pagpunay og laag sa magbarkada ug mosangpot sa pagka-Out-of-School Youth (OSY).
Segun sa maong opisyal nga sagad sa mga batan-on nga sayo nakighilawas walay gamit nga depensa maong nangabuntis bisan og linghod pa sila og pangedaron.
Busa, gipalihok na karon ni Calvo ang iyang Sangguniang Kabataan (SK) aron magbuhat og mga programa nga magtubag sa kaso sa early pregnancy sa iyang barangay.
Kabahin sa mga programa nga makatabang sa pagsulbad sa early pregnancy mao ang responsible parenthood, paggahin og pundo alang sa mga events ug pakig-alayon sa mga eskwelahan.
Tumong usab nga magiyahan og ensakto sa mga ginikanan ang ilang mga anak gani kung malingaw sa mga programa sa barangay ang mga batan-on, wala na untay mabuntis og sayo.
RadyoMaN Joel Viray
