Wala pa gihapon nailhan ang suspek nga mipusil patay sa usa ka canteen owner sa Cagayan de Oro Corn Products diha sa may Purok 5, Tablon niadtong Huwebes.
Hinoon gikompirma na sa mga kapolisan nga kasong pagpangawat ang nahimong motibo niini gumikan usab sa nawala nga matud pa gidala sa suspek nga 140k nga cash.
Nailhan ang biktima sa pangalan nga si Robert Luz nga taga Jasaan,Misamis Oriental.
Banda alas 3 sa hapon sa dihang bag-o lang nahuman ug pa encash ang 38 anyos nga biktima sa cheke niini sa Banco de Oro branch ug naglakaw na pabalik sa canteen sa dihang nahitabo ang pag-atake kaniya. Nailhan usab ang biktima nga usa diay ka anak sa retired police officer.
Matud pa ni Cugman police station commander Chief Insp. Ian Borinaga nga naigo sa dughan sa ikaduhang beses ang biktima gamit ang .45 caliber nga pistola. Gilayon nga gidala sa suspek ang kwarta ni Luz nga unta pangsweldo sa iyang mga trabahante.
Nadala pa sa hospital ang biktima apan nakabsan ra gihapon kini sa iyang hinulamang kinabuhi banda alas 6 sa gabii. Misibat gilayon matud pa ang suspek sakay sa usa ka motorsiklo.
Aduna nay matud pa gidudahan nga suspek ang mga pulis apan naghulat pa sila sa dugang impormasyon aron makahimo ug case build up mahitungod niini.
