Roxas City, Capiz- Ginpasakopan sang nagkatuhay nga mga organisasyon kag grupo sang indibidwal ang ginpatigayon nga 1- Million Kahoy Project.
Ang amo nga aktibidad ang ginpangunahan sang Capiz Provincial Environment and Natural Resources Office(CAPENRO) ang launching sang nasambitan nga programa kadungan sang pag-obserbar sang Provincial Arbor Day sa probinsya sang Capiz.
Ginpamunoan ni Capiz Gov. Nonoy Contreras ang ceremonial planting sang mga mangroves sa Sitio Guibongan, Brgy. Lonoy, Sapian, Capiz kaupod sanday Sapian Mayor Arthur John H. Biñas; Provincial Administrator Edwin Chinel Monares, CPPO Provincial Director Col Julio Gustilo Jr. kag iban pa nga mga opisyales.
Matapos sini, nagpadulong man ang gobernador sa Camp Belo sa banwa sang Panitan para sa ceremonial planting sang Philippine Native Trees kun sa diin ini naman ang gintambungan sang mga partner agencies.
Gindayaw sang gobernador ang mga nagpartisipar sa amu nga aktibidad kag gintawag nga Eco-Warriors bangud sa wala untat nga suporta agud nga maduso ang mga programa sang gobyerno agud nga protektahan ang palibot.
📷(c) – Col Julio Gustilo Jr.
