Roxas City, Capiz- Ginasigahom nga antes ang Semana Santa, ma-release na ang cash incentives sang mga atleta nga nakakuha sang gold kag silver medals sa nagtapos nga WVRAA 2018 nga ginpatigayon sa syudad sang Iloilo sang nagligad nga Pebrero 19-23 sini nga tuig.
Ini ang ginpondohan sang kapin P308, 000 pesos kun sa diin ginapreparar na sang opisina sang Sports and Business Management Unit ang payroll kag listahan sang mga atleta nga hatagan sang insentibo.
Nahibaluan nga may yara sang 11 ka mga gold medalist sa elementarya kag 15 naman sa sekondarya samtang 18 man ang nakakuha sang silver medal sa elementarya kag 20 sa secondarya.
Base sa ordinansa, magabaton sang P6, 000 pesos ang atleta nga makakuha sang bulawan nga medalya sa regional sports competition samtang P4, 000 pesos naman ang pata sa silver medalist.
Ang mga gold medalist amo naman ang magarepresentar sa Western Visayas sa Palarong Pambansa nga hiwaton sa Vigan, Ilocos.
