Capiz PNP, naka-alerto kadungan sang pagsaulog sang UNDAS

239

CAPIZ – Wala sang positibo nga impormasyon nagikan sa intelligence network sang Capiz PNP angut sa mga grupo nga magahana sa pagtuga sang kalakasan kadungan sang pagsaulog sang undas, ini ang ginpahayag ni Police Senior Superintendent Samuel Nacion, Provincial Director sang Capiz Police Provincial Office.
Suno diri, nagapabilin nga alerto ang mga kapulisan sang tagsa ka mga police station sa bug-os nga probinsya. Ginpahayag man ni Nacion nga mas ginpasangkad sang ila nga hanay ang security plan, agud mapasiguro ang kalinong kag latawhay sa selebrasyon sang Undas ukon tigkalalag.
Kapareho sang kinaandan, nagpahamtang sang mga police assistance desk ang PNP sa mga dalagko nga sementeryo sa bug-os nga probinsya. Nagpangayo man sang kooperasyon si Nacion sa publiko nga sundon ang mga panugyan sang PNP kag likawan ang pagdala sa mga armasluthang, patalom, kag mga makahulubog nga ilimnon sa sulod sang mga sementeryo.
Nagpaandam man ini sa publiko nga mag-aligmat sa tanan nga oras agud indi mabiktima sang mga kawatan kag mga persona nga nagapamintaha.

Facebook Comments