Roxas City, Capiz- Ginpat-od ni CPPO Provincial Director Col Julio Gustilo Jr nga nakahanda ang kapulisan nga magbulig agud nga i-transport ang bangkay sang mga nagkalamatay nga sibilyan sa Tapaz nga mabalik sa tagsa nila ka mga panimalay.
May kaangut sini gindula sang provincial director ang nabatyagan nga kahadlok sang mga residente angut sa presensya sang kapulisan bangud ang katuyoan sini amo nga ma-tsekyar gid lamang ang seguridad sang mga pomuluyo sa lugar.
Nahibaluan nga sa subong, regular ang ginapatigayon nga preventive security patrol sang kapulisan sa area samtang yara man ang presensya sang militar para sa pagpatigayon sang community support program.
Sa pihak nga bahin magahatag sang bulig ang provincial government sang Capiz sa siyam ka mga indibidwal nga napatay sa maduguon nga pagserbe sang search warrant sa pila ka mga kabarangayan sa banwa sang Tapaz.
Ini ang ginkumpirmar ni Col Julio Gustilo Jr.
May kaangut sini, iya man nga ginmanduan ang hepe sang Tapaz Municipal Police Station nga i-monitor kun nakumpleto na sang mga pamilya ang mga papeles nga ginakinahanglan agud mahatagan sang assistance sang gobyerno ang mga ini.
Sa subong yara pa nakahaya sa punerarya sa banwa sang Tapaz ang mga bangkay sang walo ka nagkalamatay nga mga sibilyan samtang ang isa ang ginpakamaayo sang iya pamilya nga dal-on sa banwa sang Calinog sa Iloilo.
