CAPIZEÑA OFW, DISMAYADO MATAPOS NGA MADULAAN INI SANG GAMIT SA IYA BAGAHE!

Roxas City, Capiz – Nagpabutyag sang pagkadismaya ang isa ka OFW nga tagabanwa sang Jamindan angut sa na-eksperiensyahan sini sa iya flight pauli sa Capiz sakay sa Cebu Pacific Airlines.
Suno sa tagreklamo nga si Jonavie Vigo, tumandok sang Barangay Milan, Jamindan, Capiz nga pag-abot sa Roxas City Airport ginkatingala sini sang madula ang iya bagahe.
Aminado ini nga may yara sang isa ka maleta nga nabilin sa luggage area apang wala niya ini ginsapak bangud kay naputos sa wrapping plastic sa pagpati nga indi iya.
Sang ginbuksan ang amo nga maleta kaupod ang presensya sang airport police kag mga empleyado sang airlines, nakibot ini nga gisi na ang iya nga bagahe. Kun lantawon, kasubong nga ginpwersa ini nga buksan gamit ang kutsilyo ukon anuman nga matalom nga bagay.
Sang iya gintsekyar, nadiskubrehan sini nga kalakip sa mga nadula amo ang mga alahas kag chocolate nga pasalubong sini sa iya pagpauli.
Nagapati si Vigo nga posible sa Manila natabu ang amo nga insidente.
Sa subong nagapreparar na ang natungdan sa pagdihun sang nagakaigu nga reklamo sa tagdumalahan sang nasambitan nga airline company.