Bayog, Zamboanga del Sur – Dead on arrival sa ospital ang 21 anyos nga lalaki human kini nawad-an ug control sa iyang gimanehong motorsiklo ug nabagnos sa karsada, alas 10:45 kagahapon sa buntag sa Sitio Manangil, Barangay Dipili, Bayog, Zamboanga del Sur.
Ang biktima giilang si John Mark Alegado Supapo, minyo, usa ka car painter ug residente sa Purok 2, Barangay Damit, Bayog, Zamboanga del Sur kinsa nagmaneho sa iyang single motor SUZUKI Raider 150, color pula nga walay plate number.
Sa imbestigasyon nasayran nga ang biktima ang nagbyahe gikan sa iyang panimalay paingon sa Barangay Dipili, Bayog, apan sa pag-abot ngadto sa Bayog-Imelda Sub National Highway, nawad-an kini ug control sa iyang gimanehong motor hinungdan nga nabalintong, nabagnos ug naparok ang ulo sa biktima.
Nakaangkon ug mga samad sa nawong ug bun-og sa ulo ang biktima ug daling gidala ngadto sa Bayog Rural Health Unit arun katambalan apan gideklara kining dead on arrival sa doctor nga mihiling sa biktima alas 11 kagahapong adlawa.
