Davao City – Kinahanglan magbaton sa 5-days old Rapid Diagnostic Test (RDT) negative result, ang mga pasaherong mosulod sa Caraga Region.
Kini ang gibutyag ni Atty. Armand Dioso, Regional Director sa Land Transportation Franchising and Regulatory Board (LTFRB-XI) atol sa interbyu sa DXDC RMN Davao kabahin sa pag-abli sa Inter-Regional Bus Trips nga gilaumang magsugod karong semanaha o sa sunod nga semana.
Matud ni Dioso, kini ang rekisitos nga ginapangayo sa Caraga Region gawas sa health screening sa matag Local Government Unit (LGU) pasulod sa maong rehiyon.
Samtang nagpaabot pa ang LTFRB-XI kung adunay rekisitos nga pangayoon ang Davao Region sa mga gikan sa Caraga Region.
Nagpasalamat usab ang LTFRB-XI official sa pagtugot sa maong biyahe gawas sa Davao Region nga maoy dugay na nga gipaabot labi na sa mga Locally Stranded Individuals.
“Nagpasalamat ta dili lang sa Davao region but sa neighborhood region nato nga nag allow na sila og bus trips going and from Davao Region,” esplikar ni Dioso.
RadyoMaN Kirby Manzon
