Davao City – Personal nga mipatim-aw ang gitudlong suspek sa pagpusil patay sa usa ka car dealer sa Barangay Sto. Niño Tugbok District ning syudad sa Davao.
Pinaagi sa tulumanong Kuskos Batikos sa RMN DXDC Davao gipaklaro sa suspek nga si Arnold Aldirete, 47 anyos, real state developer, nagpuyo sa Barangay Mintal. nga wala niya himua ang pagpatay sa biktimang car dealer nga si Roberto Divinagracia 57 anyos.
Gipaklaro ni Aldirete nga didto siya sa Panabo City uban ang iyang ka-sosyo sa negosyo nga si Al Punzalan sa dihang gipusil patay ang biktima.
Apan gi-angkon ni Aldirete nga iyang gireklamo sa barangay ang biktima tungod sa dugay na niining utang.
Kahinumdoman nga samtang naglingkod ang biktima sulod sa iyang panimalay kalit kining gipusil sa armadong nakamotorsiklo alas 7:00 ang takna sa kagabhion.
RadyoMaN Erin Lumosbog
