Cauayan City – Ibinida ng DA-Bureau of Fisheries Aquatic Resources 2 ang bagong tagumpay ni Dr. Emma L. Ballad, Agricultural Center Chief II, matapos muling pagkalooban ng Career Scientist I rank sa ilalim ng Scientific Career System ng Civil Service Commission.
Ang kanyang malawak na karanasan at mga pag-aaral, kapwa sa bansa at sa ibang bansa, ay nagbigay daan sa kanyang makulay na landas sa loob ng Bureau of Fisheries and Aquatic Resources (BFAR).
Si Dr. Ballad ay isang eksperto sa fisheries resource management at governance, kilala sa kanyang mga makabago at pionerong kontribusyon sa pangangalaga ng mga coastal areas.
Isa sa kanyang mga pangunahing tagumpay ay ang pag-gabay sa mga lokal na pamahalaan sa pagtatatag at pamamahala ng mga marine protected areas.
Itinataguyod din niya ang sustainable ecotourism, pagpapalago ng mga mekanismo sa pagpopondo, at ang pagpapahalaga sa ekonomiyang aspeto ng mga coastal resources na nakikinabang ang parehong kalikasan at mga komunidad.
Bilang isang lider at dedikadong lingkod-bayan, si Dr. Ballad ay patuloy na nagsusulong ng community-based co-management approaches, na nag-uugnay ng mga siyentipikong polisiya at aktibong partisipasyon ng mga lokal na komunidad.
Sa kanyang mga hakbang, nagtagumpay siya sa pagpapalaganap ng sustainable na pamamahala ng mga likas na yaman, na nagdudulot ng positibong pagbabago sa kalikasan at sa buhay ng mga tao.
