TACLOBAN CITY – Ginpusil han upat nga suspek an usa nga caretaker han tuna ha Brgy. 106. Sto. Nino, Tacloban City mga ala 1:00 han kaagahon kakulop, July 19.
Subay ha report han Tacloban City Police Office, ginkilala an biktima nga hi Carlito Ohaya Jr., 48 anyos, residente ha Brgy. Madalunot, Pinabacdao, Samar.
Ginkilala naman an mga suspek nga hira Joemar Leuterio, 26 anyos; Hector Ponda, 35 anyos, mga residente han Brgy. 105, San Isidro, Tacloban City; Virgilio Carmen Aka “Tata”, residente han Brgy. 106. Sto. Nino, Tacloban City; ngan alyas “Bodol”.
Nagawas ha imbistigasyon han mga otoridad nga dida han huwebes han aga, July 18 ginsugo an biktima han tag-iya han tuna nga hi Dr. Mario Quijano nga butangan hin “No Trespassing” tarpaulin an ira tuna pero ginkompronta hiya han suspek nga hi Virgilio Carmen ngan naghulga pa ha biktima.
Kakulop han kaagahon samtang nakaturog an biktima, nakamata hiya han labayon han mga bato an barracks kun diin hiya nakaturog, gumawas hiya kay papanginanuon unta niya kun ano an natatabo, tigda nala nga nagpa-uran hin bala an mga suspek ngan naigo ha duha (2) kabeses an biktima.
Dayon nga kumaligaw an mga suspek sakay hin motorsiklo.
Maupay nala nga nadaplisan la an biktima ha wala han iya kamot ngan ha iya ulo. Gintambal na hiya ha pagka yana ha health center han Brgy. 101 New Kawayan.
Han magpa-uran hin bala an mga suspek, naigo naman an maupay an kakaturog nga hi Dante Villarmino, 56 anyos, usa nga fish vendor ngan residente ha nasabi nga lugar. Nagpapatambal na hiya ha Eastern Visayas Regional Medical Center (EVRMC).
Arestado naman an duha ha upat nga suspek nga hira Joemar ngan Hector samtang hi Virgilio ngan hi alyas bodol, kumalagiw han masabtan nga ginbibiling hira han mga otoridad.
