Davao City – Ang pakighinabi sa gobyerno ngadto sa mga pundok-rebelde lakip mismo ang mga lungsuranon sa mga komunidad maoy angayang buhaton aron maresolba ang mga problema niini ilabi na kung aduna silay gusto ipadayag nga mga punto.
Kini maoy gibutyag karon ni University of the Philippines (UP) political science professor Clarita Carlos sa interbyu kaniya sa tulumanong ‘Straight to the Point’.
Matud ni Carlos, husto ang katuyuan sa Davao City Government ubos kang Mayor Sara Duterte-Carpio nga molusad ug localized peacetalks kuyog sa New Peoples Army (NPA) sa Davao Region ug Southern Mindano karon nga suspindido pa ang hisgotanang pangkalinaw didto sa national level.
Nagtoo ang propesor nga sama usab sa gibuhat nga localized peacetalks sa nasud Colombia, mamahimong molampos kini dinhi sa syudad sa Davao sanglit ang mga taga-komunidad mismo ang nagtinguha ug makabenepisyo kun mabatonan na ang malungtarong kahusay ug kalinaw.
Dugang ni Carlos, walay padulngan ang armed struggle kun paggunit ug armas aron usbon ang atong katilingban sanglit aduna may higayon nga ang mga dagkung suliran sa nasud masolusyonan pinaagi sa maayong istorya ug dili diha sa paggamit sa hinagiban ug pwersa.
RadyoMan Jason Amisola
tas: dxdc 621 davao
