Dimataling, Zamboanga del Sur – Makuti nga imbestigasyon ug follow up police operation ang gilusad karun sa kapulisan sa lungsod sa Dimataling aron madakpan ang responsable sa pagpangawat og motorsiklo didto sa Purok 3, Barangay Bacayawan sakop sa nahisgutang munisipyo.
Mahinumduman nga nagpalaban sa kapulisan ang si Fretz Iburan 20 anyos, grade 10 student, kauban ang iyang inahan dihang nadiskobrehan nga nahanaw na sa giparkingan ang Kawasaki Rouser 135, color itom nga walay plaka numero.
Sa inisyal nga imbestigasyon nasayran nga alas 9:00 sa gabii gipahiluna ang maong motorsiklo sa atubangan sa balay sa iyang igsoon, nalingaw ang biktima sa salida sa telebisyon samtang naghulat usab nga ma-full charge ang iyang cellphone apan nakugang nalang kini dihang sa iyang pagawas wala na sa lugar ang single motor.
Sa nagpadayon nga imbestigasyon gitrumbok nga suspek si Junrey Colango alyas “Long-Long” 20 anyos temporaryo nga nanimuyo sa Brgy. Bacayawan, Dimataling apan lumad nga taga Ozamis City.
Gibutyag usab sa igsoon sa suspek nga si Rowena Cutad, nga base pagpakigtkutay sa iyang igsoon sa syudad sa Ozamis naabot matud pa sa ilang balay ang suspek alas 2:00 sa kadlawon apan dali ra usab kini nga nisibat dala ang motorsiklo paingon sa wala matino nga lugar.
